Marel: Uppgjör 3F 2024

Meginatriði

• Mótteknar pantanir hækkuðu í 403 milljónir evra sem má helst rekja til pantana fyrir stærri verkefni í alifuglaiðnaði. Staða pantanabókar er enn lág og nemur 33% af tekjum síðustu tólf mánaða.
• Tekjur drógust saman um 6,8% á milli ársfjórðunga og 4,1% á milli ára vegna lágrar stöðu pantanabókar. Hlutfall pantana á móti tekjum (e. book-to-bill) var 1,04 á ársfjórðungnum.
• EBITDA framlegð nam 13,8% á þriðja ársfjórðungi og EBIT framlegð 9,4%, sem er bati bæði á milli ára og ársfjórðunga, einkum á grundvelli áframhaldandi kostnaðaraðgerða.
• Búist er við aukningu í mótteknum pöntunum á komandi ársfjórðungum. Þörf er á frekari vexti pantanabókar til að styðja við tekjuvöxt og bætta rekstrarafkomu.
• Skuldahlutfall lækkaði í 3,75x. Skuldahlutfallið er vel innan marka samkvæmt lánaskilmálum sem voru 4,25x að hámarki á ársfjórðungnum.
• Horfur félagsins fyrir rekstrarárið 2024 eru óbreyttar og er reiknað með að EBITDA framlegð ársins verði á bilinu 13-14%, EBIT framlegð verði á bilinu 9-10% og að hóflegur (e. low single digit) samdráttur verði í tekjum milli ára.

Helstu atriði í afkomu á þriðja ársfjórðungi 2024 (3F24):

• Pantanir námu 402,5 milljónum evra (2F24: 393,4m, 3F23: 390,8m).
• Pantanabókin stóð í 554,1 milljónum evra (2F24: 538,5m, 3F23: 561,7m).
• Tekjur voru 386,9 milljónir evra (2F24: 415,2m, 3F23: 403,6m).
• Hlutfall pantana á móti tekjum (e. book-to-bill) var 1,04 og hlutfall pantanabókar samsvaraði 33% af tekjum síðustu tólf mánaða.
• EBITDA[1] nam 53,3 milljónum evra (2F24: 53,8m, 3F23: 52,1m) sem var 13,8% af tekjum (2F24: 13,0%, 3F23: 12,9%).
• EBIT[1] nam 36,2 milljónum evra (2F24: 37,7m, 3F23: 36,3m) sem var 9,4% af tekjum (2F24: 9,1%, 3F23: 9,0%).
• Hagnaður nam 3,8 milljónum evra (2F24: 2,1m, 3F23: 10,1m).
• Handbært fé frá rekstri fyrir fjármagnsliði og skatta var 57,1 milljónir evra (2F24: -4,0m, 3F23: 62,4m).
• Frjálst sjóðstreymi var 41,4 milljónir evra (2F24: -22,0m, 3F23: 32,4m).
• Skuldahlutfall (nettó skuldir/EBITDA) var 3,75x í lok september (2F24: 3,92x, 3F23: 3,48x).

Helstu atriði í afkomu janúar – september 2024 (9M24):

• Pantanir námu 1.188,7 milljónum evra (9M23: 1.159,9m).
• Tekjur voru 1.214,7 milljónir evra (9M23: 1.273,4m).
• EBITDA[1] nam 155,2 milljónum evra (9M23: 158,5m) sem var 12,8% af tekjum tímabilsins (9M23: 12,4%).
• EBIT[1] nam 106,7 milljónum evra (9M23: 110,3m) sem var 8,8% af tekjum tímabilsins (9M23: 8,7%).
• Hagnaður nam 2,7 milljónum evra á tímabilinu (9M23: 22,3m).
• Handbært fé frá rekstri fyrir fjármagnsliði og skatta var 79,3 milljónir evra (9M23: 123,8m).
• Frjálst sjóðstreymi var 30,6 milljónir evra (9M23: 26,0m).

1 Rekstrarniðurstaða og EBITDA aðlöguð fyrir afskrift á óefnislegum eignum tengdum yfirtökum (PPA), kostnaði tengdum yfirtökum og einskiptiskostnaði vegna endurskipulagningar. Á fjórða ársfjórðungi 2023 og fyrsta ársfjórðungi 2024 er rekstrarniðurstaða jafnframt leiðrétt fyrir kostnaði tengdum endurskipulagningu á vöruframboði félagsins.
2 Nettó skuldir (án leiguskuldbindinga) / Pro forma leiðrétt EBITDA síðustu 12 mánaða (að yfirteknum félögum meðtöldum) án óreglulegra liða samkvæmt lánasamningum Marel.

Finna má ítarlegri umfjöllun um rekstur og afkomu félagsins í enskri útgáfu fréttatilkynningarinnar sem finna má í viðhengi (íslenska þýðingin veitir aðeins stutt yfirlit yfir helstu þætti uppgjörsins, horfur, fjárfestafund og fjárhagsdagatal).

Árni Sigurðsson, forstjóri Marel:
„Uppgjör þriðja ársfjórðungs endurspeglar áherslur og aðgerðir félagsins til að bæta skilvirkni og hagræða í rekstri á tímum áskorana í ytra umhverfi. Það er ánægjulegt að framlegð síðustu tveggja fjórðunga hækkar þrátt fyrir lægri tekjur á þriðja ársfjórðungi sem sýnir glöggt þann árangur sem náðst hefur í bættum rekstri félagsins.

Það er einnig uppörvandi að sjá verulega aukningu í mótteknum pöntunum í alifuglaiðnaði og við búumst við auknum pöntunum heilt yfir, þrátt fyrir að pantanir í öðrum iðnuðum hafi verið lægri í fjórðungnum. Með auknum pöntunum og hærri pantanabók samhliða hagræðingaraðgerðum gerum við ráð fyrir að skila áframhaldandi bata í rekstri. Að því sögðu staðfestum við horfur félagsins fyrir árið 2024 og til meðallangs tíma (e. mid-term).

Fyrirhugaðri sameiningu við JBT miðar vel áfram og stefnt er að því að gengið verði frá viðskiptunum eigi síðar en 3. janúar 2025. Það eru sterk rök fyrir sameiningu félaganna og ég er fullur tilhlökkunar að grípa þau tækifæri sem munu skapast í framhaldinu fyrir viðskiptavini, starfsfólk og hluthafa okkar. Saman munum við halda áfram að sækja fram og ná árangri á grundvelli viðamikillar þekkingar og reynslu beggja félaga, Marel og JBT.”

Valfrjálst yfirtökutilboð JBT, fyrirhugað er að viðskipti verði frágengin eigi síðar en 3. janúar 2025
Þann 24. júní sl. lagði John Bean Technologies Corporation („JBT“) fram valfrjálst yfirtökutilboð í allt útistandandi hlutafé í Marel í samræmi við ákvæði laga nr. 108/2007 um yfirtökur.

Tilboðið byggir á skilmálum og skilyrðum sem sett eru fram í opinberu tilboðsyfirliti sem samþykkt var af Fjármálaeftirliti Seðlabanka Íslands og birt var þann 24. júní 2024. JBT hefur einnig birt lýsingu vegna tilboðsins. Frekari upplýsingar aðgengilegar hér.

JBT stefnir að því að gengið verði frá viðskiptunum eigi síðar en 3. janúar 2025 og JBT og Marel vinna nú að því að uppfylla hefðbundin skilyrði valfrjálsa tilboðsins.

Á sérstökum hluthafafundi JBT í ágúst sl. samþykktu yfir 99% greiddra atkvæða tillögu um útgáfu viðbótarhlutafjár í JBT vegna fyrirhugaðra kaupa á Marel.

Hvað varðar skilyrði tilboðsins sem snúa að samþykki eftirlitsyfirvalda hefur JBT tilkynnt um að eftir undirbúningsferli sem fól í sér ítarlega upplýsingagjöf og samskipti við Framkvæmdastjórn Evrópusambandsins sendi JBT inn formlega samrunatilkynningu þann 23. október sl. og hófst þar með lögbundinn 25 virkra daga frestur, sem rennur út 28. nóvember nk., sem Framkvæmdastjórnin hefur til þess að tilkynna um hvort hún telji ástæðu til frekari rannsóknar á samkeppnislegum áhrifum samrunans ellegar samþykkja hann. JBT býst jafnframt við því að fá samþykki ástralskra samkeppnisyfirvalda á svipuðum tíma og samþykki Evrópusambandsins verði veitt.

Fjármálaeftirlit Seðlabanka Íslands hefur nú samþykkt beiðni JBT um framlengingu á gildistíma valfrjálsa yfirtökutilboðsins til 20. desember 2024. Að því gefnu að samþykki hluthafa sem fara með að minnsta kosti 90% heildarhlutafjár í Marel fáist, stefnir JBT að því að uppgjör viðskiptanna eigi sér stað innan fimm virkra daga frá því að gildistími tilboðsins rennur út þann 20. desember, þ.e. eigi síðar en 3. janúar 2025.

JBT hefur gengið frá samningi um fjármögnun sem er háð því að viðskiptin gangi í gegn, annars vegar útgáfu á 900 milljón dollara sambankaláni og hins vegar rýmkun á núverandi lánalínu í 1,8 milljarða dollara. Þeim fjármunum, auk reiðufjár á efnahagsreikningi, verður ráðstafað til greiðslu þess hluta tilboðsins sem er til greiðslu með reiðufé, endurfjármögnunar útistandandi skulda Marel og greiðslu kostnaðar tengdum viðskiptunum. 

Í kjölfar birtingar yfirtökutilboðsins, birti stjórn Marel greinargerð stjórnar með rökstuddu jákvæðu áliti hvað varðar tilboðið og skilmála þess þar sem fram kemur að það sé samhljóða álit stjórnar að (i) styðja tilboðið, þar með talið tilboðsverðið og aðra skilmála þess, (ii) mæla með því að hluthafar Marel samþykki tilboðið, og (iii) fyrirhuguð sameining félaganna hafi jákvæð áhrif er varðar hagsmuni Marel og starfsmanna félagsins. Við undirbúning greinargerðarinnar fékk stjórn Marel ráðgefandi álit frá J.P. Morgan og Rabobank varðandi sanngirni endurgjalds til hluthafa í fyrirhuguðu yfirtökutilboði út frá fjárhagslegu sjónarmiði.

Horfur fyrir árið 2024 staðfestar, óvissa ríkir enn til skemmri tíma litið
Markaðsaðstæður eru áfram krefjandi í ljósi mismunandi eftirspurnar eftir iðnuðum, verðbólgu og hárra vaxta sem fara hægt lækkandi, auk áframhaldandi spennu á alþjóðavettvangi sem skapar óvissu til skemmri tíma. Tíminn sem það tekur að tryggja innborganir og fjármögnun fyrir viðskiptavini vegna stærri verkefna heldur áfram að taka lengri tíma. Þetta endurspeglast í mótteknum pöntunum á fyrstu níu mánuðum ársins.

Gert er ráð fyrir bata í mótteknum pöntunum á komandi ársfjórðungum í ljósi betri horfa á markaði. Til að ná fram vexti í tekjum og bættri afkomu þarf að byggja upp pantanabók félagsins.

Marel staðfestir horfur sínar fyrir rekstrarárið 2024 og reiknar með að EBITDA framlegð ársins verði á bilinu 13-14%, EBIT framlegð verði á bilinu 9-10% og að hóflegur (e. low single digit) samdráttur verði í tekjum á milli ára.

Marel staðfestir jafnframt horfur félagsins til meðallangs tíma litið (e. mid-term). Marel starfar á spennandi vaxtarmörkuðum og gerir ráð fyrir að árlegur meðalvöxtur markaðar nemi 4-6% þar sem aukin áhersla sjálfvirkni, róbótatækni og stafrænar lausnir til að hámarka afköst og mæta áskorum viðskiptavina varðandi betri nýtingu hráefna, skort á vinnuafli, háan aðfangakostnað og aukinn fjölda afurða, munu halda áfram að styðja við vaxtarhorfur félagsins til lengri tíma litið.

Afkomufundur með markaðsaðilum – beint streymi
Fimmtudaginn 31. október 2024 kl. 8:30 verður haldinn afkomufundur í beinu streymi fyrir fjárfesta og markaðsaðila. Þar munu Árni Sigurðsson forstjóri og Sebastiaan Boelen fjármálastjóri kynna afkomu félagsins og helstu atriði úr rekstri á þriðja ársfjórðungi.

Athugið að fundurinn verður eingöngu rafrænn. Fundinum verður streymt beint á Zoom og upptaka af fundinum verður aðgengileg á marel.com/ir eftir fundinn.

Skráning fer fram hér. 

Fjárhagsdagatal

• 4F 2024 – 12. febrúar 2025
• Aðalfundur – 26. mars 2025