Sparebanken Sogn og Fjordane - 2. kvartal 2022

10 Aug 2022 17:00 CEST

Styret i Sparebanken Sogn og Fjordane har handsama rekneskapen for 2. kvartal
2022. Rekneskapen viser eit resultat etter skatt på 143 millionar kroner for
kvartalet og ein eigenkapitalavkastning på 9,8 %.

Netto renteinntekter enda på 268 millionar kroner, ein auke på 37 millionar
kroner frå 2. kvartal 2021 og ein auke på 11 millionar kroner frå førre kvartal.


Veksten i utlån til privatmarknaden held seg sterk. For første gong er netto
utlånsvekst til privatmarknaden over 1 millard kroner på eit kvartal. Banken har
vekst i utlån på 7,3 % siste 12 månadar til privatmarknaden. Innanfor
bedriftsmarknaden er etterspurnaden på veg litt opp igjen og der er 12 månader
vekst no på 3,8 %. Innskotsveksten er god både frå privatmarknaden (6,1 %) og
særleg frå bedriftsmarknaden (17,3 %).

Andre driftsinntekter eksklusiv finansielle postar aukar med 3 million kroner
frå 2. kvartal 2021 til 43 millionar kroner. Det er særleg betalingsformidling
som aukar, som følgje av auka reiseaktivitet. Finansielle postar er prega av
marknadsuroen og enda på -11 millionar kroner mot + 60 millionar kroner i 2.
kvartal 2021. Det er særleg renteinstrument som påverkar negativt dette
kvartalet som følgje av auka lange renter og kredittpåslag, medan vi på same tid
i fjor hadde ein god verdiauke på aksjar.

Kostnadane er auka med 11 millionar kroner, samanlikna med 2. kvartal 2021, til
125 millionar kroner. Auka personalkostnader er hovudårsaka. Mellom anna er det
kostnadsført i overkant av 3 millionar kroner knytt til innføring av
spareprogram i eigenkapitalbevis i banken, der alle tilsette fekk tildelt
eigenkapitalbevis i banken i løpet av 2. kvartal.

Banken har inntektsført netto 13 millionar kroner på tap i kvartalet. Same
kvartal i fjor hadde banken ei tapsavsetning på 9 millionar kroner.

I sum gir dette eit resultat etter skatt på 143 millionar kroner. Hittil i år er
resultat etter skatt 290 millionar kroner, noko som gir 9,8 % i
eigenkapitalavkastning.

Konsernet har pr. 30.06.21 rein kjernekapitaldekning på 17,1 % og total
kapitaldekning på 20,0 %. Med tillegg av perioderesultat og fråtrekk av forventa
utbytte er estimert rein kjernekapitaldekning 17,7 %.

Den fullstendige kvartalsrapporten er lagt ved, saman med ein presentasjon av
tala pr. 2. kvartal 2022.

Kontaktpersonar:
Trond Teigene, adm. direktør, tlf. 908 25 086
Frode Vasseth, direktør økonomi og finans, tlf. 951 98 452

More information:
Access the news on Oslo Bors NewsWeb site

568181_SSF 2 kvartal 2022.pdf
568181_SSF Investorpresentasjon Q2 2022.pdf