SpareBank 1 Sogn og Fjordane - 4. kvartal 2025

13 Feb 2026 17:00 CET

Styret i SpareBank 1 Sogn og Fjordane har handsama rekneskapen for 4. kvartal
2025. Rekneskapen viser eit resultat etter skatt på 195 millionar kroner for
kvartalet og ein eigenkapitalavkastning på 10,3 %. For heile året har banken eit
resultat etter skatt på 886 millionar kroner og ein eigenkapitalavkastning på
11,9 %

Netto renteinntekter enda i 4. kvartal på 372 millionar kroner, ein reduksjon på
29 millionar kroner frå 4. kvartal 2024 og ein reduksjon på 22 millionar kroner
frå førre kvartal. Reduksjonen kjem både av reduserte marginar og av at banken
no har begynt å overføre lån til SpareBank 1 Boligkreditt. Ved utgangen av 4.
kvartal har banken til saman overført bustadlån på om lag 10 milliardar kroner
til SpareBank 1 Boligkreditt. Banken har vekst i utlån til privatmarknad på 6,0
% siste 12 månadar, inkludert volum overført til SpareBank 1 Boligkreditt. For
bedriftsmarknaden har banken ein auke i utlån på 6,8 % siste 12 månadar.

Andre driftsinntekter eksklusiv finansielle postar aukar med 30 million kroner
frå 4. kvartal 2024 til 68 millionar kroner. Dette kjem av ein god utvikling på
fleire områder. Provisjonsinntekter frå lån overført til SpareBank 1
Boligkreditt, styrka lønnsemd på betalingsformidling etter inntreden i SpareBank
1, samt god utvikling innan eigedomsmekling, sparing og forsikring.

Finansielle postar har netto positivt resultat på 20 millionar kroner i 4.
kvartal. Resultatet kjem i hovudsak av god resultatutvikling i felleskontrollert
verksemd i Fremtind Forsikring og SpareBank 1 Gruppen.

Banken har driftskostnadar på 202 millionar kroner i 4. kvartal, ein reduksjon
på 45 millionar kroner eller 18 % samanlikna med same kvartal i fjor, men 4.
kvartal i fjor var prega av eingongskostnadar knytt til konvertering til
SpareBank 1-alliansen. Banken har i løpet av 4. kvartal i år gjennomført ei
frivillig nedbemanning med effekt på om lag 20 årsverk reduksjon i stab og
støttemiljø. I den samanheng er det gjort avsetning i kvartalet for vederlag til
sluttavtalar med 10 millionar kroner. Nedbemanninga er venta å gi 11-13
millionar kroner i årleg innsparing frå og med 2026.

Banken har kostnadsført netto 20 millionar kroner på tapsavsetningar i
kvartalet, tilsvarande 0,03 % av brutto utlån.

I sum gir dette eit resultat etter skatt på 195 millionar kroner, ein reduksjon
på 95 millionar kroner frå førre kvartal, men ein auke på 88 millionar kroner
samanlikna med 4. kvartal 2024. 4. kvartal 2024 var prega av høge kostnadar
knytt til konvertering, medan 3. kvartal 2025 hadde høge finansinntekter.

Styret i banken foreslår ei resultatdisponering på kr 30 pr ek-bevis i utbytte,
noko som tilsvarar ein utbyttegrad på 90 % av ek-beviseigarane sin del av
disponibelt resultat. Vidare foreslår styret ei avsetning til gåver på 20
millionar kroner, slik at samla utdelingsgrad blir 79 %. Konsernet har som
følgje av dette rein kjernekapitaldekning på 17,8 % og total kapitaldekning på
21,9 %.

Den fullstendige kvartalsrapporten er lagt ved, saman med ein presentasjon av
tala pr. 4. kvartal 2025.

Kontaktpersonar:
Trond Teigene, adm. direktør, tlf. 908 25 086
Frode Vasseth, direktør økonomi og finans, tlf. 951 98 452

More information:
Access the news on Oslo Bors NewsWeb site

665878_SSF Investorpresentasjon Q4 2025.pdf
665878_SSF kvartalsrapport Q4 2025.pdf