Trafikktala i februar: Fleire utanlandsreisande – stabilt innanlands

11 Mar 2025 13:00 CET

I februar nytta 3,6 millionar reisande Avinor sine lufthamner. Dette er ein auke
på 2 prosent samanlikna med februar i 2024. Det er liten auke i talet på
innanlandsreisande, men for utanlandsreisande gjekk talet opp med 6 prosent.

I februar i fjor reiste det 1.359.878 passasjerar mellom Noreg og utlandet. I år
er talet auka til 1.438.674 reisande. - Veksten i talet på utanlandsreisande er
framleis prega av den sterke auken i turisme til Noreg. Noreg er ein attraktiv
destinasjon, og vi opplever nå ein sterk vekst vinterstid. Dette gjeld både frå
Europa, Nord Amerika og Asia. Det er her vi finn forklaringa på auken i
passasjertala, forklarer Gaute Skallerud Riise, direktør for trafikkutvikling i
Avinor.

Ingen auke i flyrørsler
Det var 45.549 flyrørsler i februar. Det er på same nivå som februar i 2024.
-Med ei framleis begrensa utvikling i talet på flyrørsler, held fyllingsgraden
fram med å stige også for februar. Samla var fyllingsgraden på 71,8 prosent,
noko som er opp over 1 prosentpoeng mot same månad i fjor. Dette er positivt for
kapasitetsutnyttinga i luftfarten, men det er også eit uttrykk for dei store
leveranseutfordringane flyselskapa står overfor. Det påverkar rutetilbodet i
marknaden, avsluttar Riise.

Framleis størst vekst for dei mindre lufthamnene
For alle Avinor sine lufthamner samla er det 2 prosent fleire reisande i februar
i år enn i februar i fjor.
Ser vi på dei store lufthamnene Oslo, Bergen, Trondheim og Stavanger (DSL), er
det liten endring samanlikna med februar i fjor, med 1 prosent samla auke.

Det er dei regionale lufthamnene (DRL) som hadde størst samla vekst i februar,
med ein auke på 8 prosent.

Fleire lovlege droneflygingar
I februar vart det meldt inn 1870 flygingar med drone i Ninox Drone - Avinor
sitt system for handtering av dronar. – Dette er ein auke på rundt femti prosent
samanlikna med februar 2024, seier Mats Gjertsen som leiar droneprogrammet til
Avinor.

-Sjølv i vintermånadene, der det normalt er lågare droneaktivitet, ser vi stadig
vekst i bruken av Ninox Drone, og dette er bra, seier Gjertsen. -Det er diverre
framleis enkelte som ikkje kan-, eller som vel å la vere, å følgje reglane for
droneflyging. Vi oppfordrar alle til å setje seg inn i regelverket før dei flyg,
og nytte Ninox Drone til lovleg flyging. På www.avinor.no/droner kjem reglane
tydeleg fram, avsluttar Gjertsen.

Lenke til statistikk:
https://avinor.no/konsern/om-oss/trafikkstatistikk/trafikkstatistikk

More information:
Access the news on Oslo Bors NewsWeb site