ÅRSMELDING OG REKNESKAP2025

Årsrekneskapen er lagt fram under føresetnad av framleis drift. Styret kjenner ikkje til at det er vesentleg usikkerheit knytt til årsrekneskapen, og kjenner heller ikkje til ekstraordinære tilhøve som har innverknad på vurderinga av banken sitt rekneskap.

Sogn Sparebank legg fram bankrekneskap i samsvar med den internasjonale rekneskapsstandarden International Financial Reporting Standards (IFRS). Rekneskapen viser eitt års samanlikningstal.

Sogn Sparebank fekk eit resultat før skatt på 142,6 mill. kroner. Driftsresultatet før skatt i 2024 var 134,8 mill. kroner. Eigenkapitalrentabiliteten av totalresultatet etter skatt vart 12,39 % i 2025, mot 8,97 % i rekneskapen for 2024.

Ordinært resultat bankdrift etter skatt for rekneskapsåret vart 113,1 mill. kroner. Tilsvarande tal i rekneskapen for 2024 var 103,8 mill. kroner.

Netto renteinntekter pr. 31.12.2025 var 187,4 mill. kroner. Tilsvarande tal i 2024 var 188,3 mill. kroner. Rentenetto i prosent av gjennomsnittleg forvaltningskapital har gått ned til 2,25 % i 2025 frå 2,35 % i 2024.

Noregs Bank reduserte styringsrenta frå 4,50 prosent til 4,25 i juni 2025, og vidare til 4,00 prosent i september 2025. Sogn Sparebank har, i tråd med denne utviklinga i marknaden, sett ned rentene på både innskot og utlån.

Banken har betalt 3,9 mill. kroner til innskotsgarantifondet og 0,3 mill. kroner til krisehandteringsfondet i 2025. I 2024 vart det betalt 3,2 mill. kroner til innskotsgarantifondet og 0,3 mill. kroner til krisehandteringsfondet.

Netto andre driftsinntekter i Sogn Sparebank i 2025 utgjorde 69,7 mill. kroner. Tilsvarande tal i rekneskapen for 2024 var 58,3 mill. kroner. Det er i rekneskapen inntektsført 38,4 mill. kroner i netto avkastning på finansielle investeringar i 2025 mot 31,5 mill. kroner i 2024.

Samla driftskostnader for Sogn Sparebank vart i 2025 114,7 mill. kroner. Målt mot gjennomsnittleg forvaltningskapital utgjorde driftskostnadene 1,38 % i snitt. Kostnader i prosent av totale inntekter ekskl. kursvinst pr. 31.12.2025 er 52,4 %.

Banken har gått gjennom låne- og garantiporteføljen, og vurdert den i samsvar med retningslinjer frå Finanstilsynet.

Sogn Sparebank har pr. 31.12.2025 netto tilbakeført nedskrivingar på utlån og garantiar med 0,2 mill. kroner. Dette er ein nedgang frå 2024 som viste tap på 6,3 mill. kroner. Tapsavsetningane er i all hovudsak knytt til kredittengasjement innan bedriftsmarknaden. Banken gjennomfører fortløpande ein grundig vurdering av utvalde engasjement for å avdekke forventa tap og gjer avsetningar i høve til det. Nærare opplysningar om tap går fram av notar og styret si vurdering under avsnitta kredittrisiko og forventa tapsutvikling.

© Vegard Aasen

Verdipapir ført over andre inntekter og kostnadar er investeringar gjort med strategisk karakter. Dei største postane over andre inntekter og kostnadar er Norway Best Group AS, Eika Gruppen AS og Eika Boligkreditt AS. Samla verdi på aksjane over andre inntekter og kostnadar har hatt ein verdiauke på 39,2 MNOK i 2025, mot ein verdireduksjon på 1,8 MNOK i 2024. Sjå note 28. Desse aksjane blir ikkje omsett i ein aktiv marknad, og verdivurderinga av aksjane er basert på emisjons- og omsetningskursar, samt banken sine eigne vurderingar.

Banken sin finansielle risiko gjennom året knyter seg til alle finansielle instrument banken er eksponert for, men spesielt til utlån/garantiar og aktivitetar i penge- og kapitalmarknaden. Risiko knytt til utlån og garantiar er omtala i eige avsnitt. Verksemda til banken skal haldast innanfor rammene for moderat risiko som styret har vedteke. Konkretiserte rammer går fram av banken sin finansstrategi. Det er banken si økonomiavdeling som er ansvarleg for finansforvaltninga. Økonomiavdelinga rapporterer direkte til adm. banksjef. Verkeleg eksponering mot vedtekne rammer blir regelmessig følgde opp og rapportert til styret. Rapporten blir utarbeida av risikoansvarleg, banken sin uavhengige kontrollfunksjon. Banken sin finansielle risiko er splitta i marknadsrisiko, kredittrisiko og likviditetsrisiko.

Marknadsrisiko er sett saman av renterisiko, kredittspreadrisiko, valutarisiko og aksjekursrisiko.

Renterisiko oppstår når det er skilnader i rentebindingstid mellom aktiva og passiva. Det er nytta ein standardisert modell for berekning av total renterisiko knytt til banken sin balanse og utanombalansepostar. Styret har sett opp interne rammer for renterisiko, og total renterisiko blir regelmessig rapportert til styret.

I tillegg til ramme for total renterisiko er det fastsett eigne rammer for kredittspreadrisiko knytt til porteføljen av sertifikat, obligasjonar samt sertifikat- og obligasjonsfond. Porteføljen har kort rentebindingstid og medfører liten renterisiko knytt til endringar i rentekurva. Uroa i kredittmarknadene har derimot påverknad på investorane sitt marginkrav, og denne spreadutgangen kan føre til betydelege kurstap på porteføljen. Slike urealiserte kurstap vert reversert fram mot forfall på det enkelte papir dersom utstedar er betalingsdyktig.

Sogn Sparebank har ei obligasjonsportefølje på enkeltpapir pr. 31.12.2025 på 10,1 mill. kroner. Renterisikoen er redusert ved at alle obligasjonane er knytt opp mot flytande rente. Banken har ei portefølje av aksje- og pengemarknadsfond på 359,5 mill. kroner med ein gjennomsnittleg rentedurasjon på om lag 0,2 år. Sett i samanheng med andre balansepostar med rentebinding, har banken likevel ein viss renterisiko.

Banken skal ikkje ta på seg valutarisiko utover eventuelle rammer vedtekne av styret. Banken har ikkje valutarisiko knytt til kontantbehaldningar, depositumskonto og pengekrav i framand valuta. Valutaeksponeringa i banken er låg. Banken har ikkje valutalån på eiga bok.

Aksjekursrisiko er knytt til porteføljen av aksjar, aksjefond og eigenkapitalbevis. Desse verdipapira er vurdert til marknadsverdi, og eit fall i kursane vil føre til at banken må bokføre eit tilsvarande kurstap. Marknadsverdien av banken si portefølje av aksjar, aksjefond og eigenkapitalbevis til verkeleg verdi over resultatet utgjorde 381 mill. kroner ved utgangen av 2024. Styret vurderer kursrisikoen i banken sine verdipapir til verkeleg verdi over resultatet som moderat. Målet til styret er å ha ei stabil langsiktig avkasting med minimal kursrisiko på banken sin portefølje.

Kredittrisiko er risiko for at låntakar ikkje vil eller ikkje er i stand til å betale lån tilbake. Med unntak for utlån og garantiar til kundar, er banken sin kredittrisiko hovudsakeleg knytt til plassering av midlar i sertifikat, obligasjonar og som innskot i andre finansinstitusjonar. Det er fastsett rammer som skal avgrense risikoen knytt til slike plasseringar.

Styret har fastsett rammer for risiko innan kredittgjeving. Kredittrisikoen vert overvaka ved misleghaldsrapportering, risikoklassifisering og bransjeanalysar.

Likviditetsrisiko er risiko for manglande likviditet til å kunne innfri forpliktingar ved forfall. Innlånsporteføljen er systematisk bygd opp med langsiktige og kortsiktige forfall. Banken har trekkrettar som ved utgangen av året ikkje var trekt opp. Skilnaden på vekst i innskot og utlån har gjort banken mindre avhengig av ekstern finansiering. Banken har pr. 31.12.2025 totalt lånt 500,6 mill. kroner frå pengemarknaden. Sjå note 35 for meir informasjon.

Likviditetsrisikoen i banken er innanfor fastsette mål. Banken har lagt vekt på at likviditetsrisikoen skal vere moderat. Med bakgrunn i dette har banken bygd opp ein stor likviditetsreserve som pr. 31.12.2025 var 691,7 mill. kroner fordelt på kontantar, innskot i finansinstitusjonar, sentralbankar. Banken har ein LCR2 (Liquidity Coverage Ratio = likvide eigendelar) pr. 31.12.2025 på 274 og NSFR (Net Stable Funding Ratio) på 134. Dette er over både offentlege krav og banken sine interne mål.

Innskotsdekninga i banken pr. 31.12.2025 er 93,9 %. Styret meiner innskotsdekninga og likviditets-risikoen i banken er god og under kontroll.

Kontantstraumoppstillinga viser anskaffing og bruk av likvide midlar. Den skal saman med andre rekneskapsopplysningar gi informasjon om konsernet si evne til å generere likvidar og banken sitt behov for finansiering. Kontantstraumen vert delt inn i følgjande hovudaktivitetar: operasjonelle aktivitetar, investeringsaktivitetar og finansieringsaktivitetar. Banken si kontantstraumoppstilling syner korleis Sogn Sparebank har fått tilført likvide midlar, og korleis desse er brukt.

Likviditetsbehaldninga i banken har gått ned til 691,7 mill. kroner pr. 31.12.2025 frå 864,2 mill. kroner pr. 31.12.2024.

Styret og leiinga er merksame på risiko for tap knytt til den daglege drifta av banken. Dette kan vere svikt i datakommunikasjon, system og rutinar. Det kan også oppstå feil grunna svikt i kontrollar, manglande kompetanse eller menneskelege feil.

For å ivareta desse viktige områda, og med mål om heile tida å bli betre, så har banken jf. CRD IV-føreskrifta etablert eit internkontrollsystem. Internkontroll er ein kontinuerleg prosess der kontrollar og tiltak blir utført av banken si førstelinje.

Adm. banksjef utarbeider ein årleg rapport til styret på gjennomføring, funn og tiltak kring siste års arbeid med internkontroll. Styret vurderer den operasjonelle risikoen til banken som akseptabel. Banken har også ein uavhengig etterlevingsfunksjon som utfører eigne kontrollar og rapporterer kvartalsvis til banken sitt styre. Banken har også system for rapportering av operasjonelle hendingar og kundeklagar, for å fange opp område med behov for tiltak for å redusere risiko for feil og eventuelt tap.

Banken har ei kontinuerleg oppfølging av utlån og garantiar med sikte på å redusere tap. Kredittrisiko knytt til utlån og garantiar vert overvaka blant anna gjennom rapportering av misleghaldne og tapsutsette engasjement, samt risikoklassifisering og individuell vurdering av enkeltengasjement. Brutto kredittforringa engasjement er på 148,7 mill. kroner ved utgangen av 2025, mot 165,0 mill. kroner i 2024. Banken gjennomfører fortløpande ei grundig vurdering av utvalde engasjement for å avdekke moglege individuelle tap, og gjer avsetningar i høve til det. God styring av risiko vil vere eit prioritert område også framover.

For komande treårsperiode forventar banken normaliserte tap på utlån og garantiar vil bli lågare enn 0,2 % av brutto utlån.

Sogn Sparebank er ein sjølvstendig, børsnotert lokalbank med eigenkapitalbevis. Banken tilbyr banktenester, forsikring og verdipapirhandel. Marknaden for Sogn Sparebank er små og mellomstore verksemder i Sogn. Innanfor personmarknaden er banken landsdekkande, med fokus på vekstområde og større byar, men Sogn skal vere det prioriterte marknadsområdet. Banken er styrt frå Sogn og i kraft av samfunnsansvaret vårt gjev vi tilbake til Sogn. Kvart år deler vi ut ein del av overskotet i form av gåvemidlar til ålmennyttige tiltak, vi sponsar organiserte aktivitetar for born og unge og vi er ein stor bidragsytar for festivalar og arrangement i vårt område. Vi kjenner lokalmarknaden vår og er ein nær medspelar for kundane våre, i tillegg til å tilby eit komplett produkt- og tenestespekter både for verksemder og privatpersonar.

Sogn Sparebank er registrert og heimehøyrande i Noreg med forretningsadresse Statsråd Evensensveg 8, 6885 Årdalstangen. Med ein desentralisert struktur utan hovudkontor, har banken kontorlokale i Aurland, Lærdal, Vik, Sogndal, Årdalstangen, Øvre Årdal og Bergen.

Sogn Sparebank sitt dotterselskap Sogn Sparebank Eigedom AS utgjer så liten del av balansen at det ikkje vert utarbeida eige konsernrekneskap. Sogn Sparebank Eigedom AS forretningsadresse Statsråd Evensensveg 8, 6885 Årdalstangen. Selskapet Sogn Forsikring AS er tilknytt selskap med forretningsadresse Markeveien 1B, 5012 Bergen.

Føremålet til Sogn Sparebank går fram av vedtektene til banken. Sparebanken har til føremål å fremje sparing ved å ta imot innskot frå ein ubestemt krins av innskytarar, og å forvalte på ein trygg måte dei midlane ein rår over i samsvar med dei lover som gjeld for sparebankar. Banken kan utføre alle vanlege bankforretningar og banktenester i samsvar med gjeldande lovgiving. Sogn Sparebank er totalleverandør av tenester innan områda finansiering, innskot, plassering, betalingsformidling, økonomisk rådgjeving, formueforvaltning og forsikring. Gjennom rådgjeving formidlar rådgjevarane sin kunnskap om berekraftige løysingar og produkt.

Banken skal ha ein eigenkapital som er tilpassa mål, strategi og risikoprofil. Sogn Sparebank hadde pr. 31.12.2025 ein eigenkapital på 1 310,8 mill. Styret har utarbeidd ein tydeleg utbytepolitikk som grunnlag for dei utbyteframlegga som vert fremja for generalforsamlinga. Utbytepolitikken er gjort kjend gjennom årsmeldinga, i banken sine kvartalsrapportar til marknaden og Oslo Børs. Styret si fullmakt til å gjere kapitalforhøging skal avgrensast til definerte føremål. Fullmakta til styret bør ikkje gjevast for eit tidsrom lenger enn fram til neste ordinære møte i generalforsamlinga.

Sogn Sparebank er oppteken av å utvikle eit gjensidig tillitsforhold til dei viktigaste interessegruppene våre. Det vert difor lagt vekt på stor openheit ovanfor interessentane i marknaden, både til dei som yter banken eigenkapital og finansiering, men òg til andre med relasjonar til banken. Alle eigenkapitalbeviseigarane skal handsamast likt, og ha same høve til påverknad. Eigenkapitalsbevisa til banken er sett i ein klasse, og skal vere fritt omsettelege. Einaste avgrensing er lovmessige krav som for tida fastset at erverv av kvalifisert del av eigenkapitalbevisa, 10 % eller meir, krev samtykke frå Finanstilsynet. For å ivareta interessene til eigarane med mindre andelar, er det i vedtektene ei stemmeavgrensing som inneber at ingen på valmøte for eigenkapitalbeviseigarane kan avgje stemme for eigenkapitalbevis som representerer meir enn 10 % av Sogn Sparebank sine totale utferda eigenkapitalbevis. Dersom fortrinnsretten til eksisterande eigenkapitalbeviseigarar vert fråviken ved kapitalhøgdingar, skal det grunngjevast. Banken har retningslinjer som sikrar at styremedlemar og leiande tilsette melder frå til styret dersom dei direkte eller indirekte har ei vesentleg interesse i ein avtale som vert inngått av banken. Styret skal klargjere banken sitt verdigrunnlag, og har i samsvar med dette utforma retningsliner for etikk- og samfunnsansvar. Banken har retningsliner for korleis verksemda integrerer med omverda, her gjeld tilhøve knytt til menneskerettar, arbeidstakarrettar, det ytre miljø, jobbe mot korrupsjon, arbeidsmiljø og for likestilling.

Ein sparebank er i utgangspunktet ein sjølvstendig institusjon der styringsstrukturen og samansetninga av styringsorgana skil seg frå aksjeselskapet, jf. § 7 i aksjelova om kva for organ ein sparebank skal ha. Generalforsamlinga er øvste organ i Sogn Sparebank, og er forankra i banken sine vedtekter kapittel 3.

Generalforsamlinga består av 22 medlemer med 11 varamedlemer. Generalforsamlinga er sett saman av fire grupper representantar. 6 medlemer og 3 varamedlemer skal veljast av og blant sparebanken sine kundar, 6 medlemer og 4 varamedlemer skal veljast av kommunane, 5 medlemer og 2 varamedlemer skal veljast av og blant banken sine tilsette, og 5 medlemer og 2 varamedlemer skal veljast av og blant banken sine eigenkapitalbeviseigarane.

Det er generalforsamlinga som fastset banken sine vedtekter, vel styremedlemer, vedtek årsrekneskapen og disponerer årsresultatet. Valnemnda til banken er vedtaksfesta i § 5-1 i banken sine vedtekter. Styret sine medlemar er ikkje ein del av valnemda. I forkant av generalforsamlinga er leiar for valnemnda til stades i styremøte, og valnemnda gjennomfører også individuelle samtalar med styremedlemane. Ei komplett liste over tillitsvalde i Generalforsamlinga er tilgjengeleg i årsmeldinga. Banken sender innkalling til møte i generalforsamlinga seinast 21 dagar før møtet skal haldast. Styremedlemene og revisor vert òg kalla inn til møta, og innkallinga vert børsmeldt. Møta vert leia av leiar i generalforsamlinga, med ein tilsett frå banken i møtesekretariatet. Underskriven møteprotokoll vert oppbevart i eigen protokoll.

Styret er forankra i § 4-1 i banken sine vedtekter, og er sett saman av 5 til 7 medlemer med inntil 7 varamedlemer som skal veljast for 2 år av generalforsamlinga. Tal medlemar og varamedlemer valde av og blant dei tilsette er i samsvar med finansføretakslova.

Eigenkapitalbeviseigarane har 1 representant i styret og 1 varamedlem, innstilt på eigenkapitalbeviseigarane sitt valmøte. Generalforsamlinga vel samla styre, styreleiar og nestleiar for to år. Kriterium for styret sine medlemar er kvalifikasjonar, kjønn, kapasitet, uavhengigheit og at representanten er eigna for vervet. Styret skal setjast saman slik at det vert sett på som uavhengig av den daglege leiinga.

Ein har ikkje sett behovet for å utarbeide eigne retningslinjer for likestilling og mangfald for samansetning av styre, leiing- og kontrollorgan. Dette vert allereie regulert i valinstruks for banken si valnemnd og instruks for valnemnd tilsette. Der kjem det mellom anna fram at det er krav til 40 % kjønnsdeling i styret. Krav til kompetanse, kapasitet og erfaring er også omtala i same instruks.

Styret utarbeider ein møteplan og finansiell kalender. Styret skal ha ei strategidrøfting knytt til mål, strategiar og gjennomføring, minst ein gong i året. Banken har utarbeidd ein eigen styreinstruks. Instruksen til adm. banksjef er godkjend av styre. Styret ser til at banken har god intern kontroll i samsvar med dei føresetnader som gjeld for verksemda, mellom anna banken sitt verdigrunnlag og etiske retningsliner. Styret skal syte for at styremedlemer og leiande tilsette skal gjere selskapet kjend med vesentlege interesser dei måtte ha i saker som styret skal handsama.

Styret har ni til tolv faste møter i året. Styret skal utarbeide risikoprofil for verksemda, i tillegg til at styret sikrar å handsame lovpålagde saker eller handsame saker som vedtektene/mandatet har krav om. Styret skal årleg evaluere mål, strategiar og risikoprofil, og gå gjennom banken sine viktigaste områder og internkontroll. Styret informerer i årsmeldinga om korleis internkontrollen er organisert.

Styret skal i eiga sak vurdere sitt eige arbeid og den samla kompetansen i styret. Godtgjersle til styremedlemene skal fremjast av valnemnda og godkjennast av generalforsamlinga.

Styregodtgjersle vert elles vurdert mot godtgjersle hjå andre samanliknbare selskap, og justert etter dette. Finansføretaklova regulerer kva andre verv styremedlemar kan ta på seg i tillegg til styrevervet i banken. Det vert i årsmeldinga informert om alle godtgjersler til styremedlemene. Dersom det har vore gjeve godtgjersle utover vanleg styrehonorar, skal det spesifiserast. Fastsetting av godtgjersle til adm. banksjef skal gjerast av styret. Samla godtgjersle til adm. banksjef skal gå fram av årsmeldinga.

Det er teikna ansvarsforsikring for medlemmane i banken sitt styre og dagleg leiar i høve deira ansvar ovanfor føretaket og tredjepartar. Forsikringa er teikna i Lockton Companies AS. Forsikringsdekninga gjeld for styre- og leiaransvar, profesjonsansvarsforsikring for finans og kriminalitetsforsikring.

Banken har etablert eige revisjons- og risikoutval som er forankra i § 4-2 i banken sine vedtekter, og skal veljast av og blant medlemane i styret. Utvalet er også lovpålagt. I 2025 har revisjons- og risikoutvalet vore samansett av 2 medlemer. Revisjons- og risikoutvalet skal samla ha den kompetansen som ut i frå banken sin organisasjon og verksemd er nødvendig for å ivareta oppgåvene sine. Minst eitt av medlemane i revisjons- og risikoutvalet skal vere uavhengig av verksemda og ha kvalifikasjonar innan rekneskap eller revisjon. Styremedlemar som er leiande tilsette, kan ikkje veljast til medlemer av revisjons og risikoutvalet. Oppgåvene til revisjons- og risikoutvalet går fram av vedtektene § 4-2.2:

• førebu styret si oppfølging av rekneskapsrapporteringsprosessen
• overvake systema for internkontroll og risikostyring, og banken sin internrevisjon om slik funksjon er etablert
• ha kontinuerleg kontakt med banken sin valde revisor om slik funksjon er etablert
• vurdere og overvake revisor sin uavhengigheit jf. revisorlova kapittel 4, herunder særleg i kva grad andre tenester enn revisjon som er utlevert av revisor eller revisjonsselskapet utgjer ein trussel mot uavhengigheita.

Ansvaret for risiko og compliance i Sogn Sparebank har i 2025 vorte handtert av to tilsette i banken, som også har andre oppgåver i tillegg. Som følgje av ei omorganisering gjeldande frå 01.02.26 vert ansvaret for risiko og compliance handtert av ein person. Banken har fokus på risiko- og kapitalstyring, og det er ein integrert del av styret sitt arbeid. Konsernet sin overordna risikoeksponering og risikoutvikling vert følgd opp gjennom periodiske risikorapportar til styret.

Banken si risiko- og kapitalstyring er knytt opp mot fire hovudområde:

• Operasjonell risiko
• Kredittrisiko
• Marknadsrisiko
• Likviditetsrisiko

Styret har ansvaret for å initiere ICAAP-prosessen og kapitalplanlegginga i banken, og set mål for eit kapitalnivå som er tilpassa banken sin risikoprofil og forretningsmessige rammevilkår. ICAAP prosessen er ein integrert del av banken si samla risiko- og kapitalstyring. Minst ein gong i året skal ICAAP-prosessen med risikoområda til banken vurderast og handsamast i styret. Dette arbeidet vert vidare lagt fram for revisor for gjennomgang. Adm. banksjef er ansvarleg for at banken si risiko- og kapitalstyring vert følgd opp etter rammer vedtekne av styret. Styret fastset risikoprofilen til banken, gjennom overordna rammer, fullmakter og retningsliner for risikostyring. Styret ser til at banken har ein ansvarleg kapital som er forsvarleg ut frå risikoprofilen til banken og krav frå styresmaktene.

På grunnlag av datamateriell produsert av Tieto Evry og Eika Gruppen AS, utarbeider administrasjonen i banken i samarbeid med Eika Rekneskap og kompetanse finansiell rapportering for Sogn Sparebank. Styret fører tilsyn med at rapporteringa skjer i samsvar med gjeldande lovgiving, rekneskapsstandarar, fastsette rekneskapsprinsipp og etter styret sine retningslinjer. Sogn Sparebank har etablert ein policy for internkontroll som fastset målsetjingar, organisering og gjennomføring av internkontrollarbeidet. Sogn Sparebank skal ha årleg gjennomgang av risiko og internkontroll.

Styret har fastsett retningsliner for rapportering av finansiell og annan informasjon. Retningslinene er basert på openheit og tek omsyn til kravet om likebehandling av aktørane i verdipapirmarknaden og krav til informasjon til eigenkapitalbeviseigarane.

På banken si heimeside og Oslo Børs offentleggjer banken finansiell kalender som inneheld datoar for viktige hendingar som møte i generalforsamlinga, offentleggjering av års- og delårsrapportar og utbetaling av eventuelt utbyte. Informasjon til marknaden elles vert formidla på banken si heimeside, på Oslo Børs og gjennom pressemeldingar.

Det er vedteke eigne retningsliner for tilsette og tillitsvalde i banken som handlar med eigenkapitalbevis.

© Vegard Aasen

Sogn Sparebank er ein sjølveigd institusjon som ikkje kan bli overteken av andre gjennom oppkjøp. Pr. 31.12.2025 eig eigenkapitalbeviseigarane 11,84 % av eigenkapitalen i banken. Den resterande delen er sparebanken sitt fond. Ved kjøp av meir enn 10 % av eigenkapitalbevisa i banken, må kjøpar søke løyve frå Finanstilsynet. Ved oppkjøp frå banken si side vert det lagt vekt på å ivareta alle interessene på ein tilfredsstillande måte.

Revisor skal årleg leggje fram for styret og revisjonsutvalet hovudtrekka i ein plan for gjennomføring av revisjonsarbeidet. Revisor deltek i styremøte som handsamar årsrekneskapen. I møta skal revisor gå gjennom eventuelle vesentlege endringar i rekneskapsprinsippa til banken. Dessutan skal revisor vurdere vesentlege rekneskapsestimat, og alle vesentlege forhold der det har vore usemje mellom revisor og administrasjonen. Revisor skal minst ein gong i året gå gjennom internkontrollen i banken med styret og revisjonsutvalet, identifisere svakheiter og kome med forslag til forbetringar. Styret og revisor skal ha minst eitt møte i året utan at Adm. Banksjef eller andre frå den daglege leiinga er til stades. Revisjonsutvalet skal godkjenne bruk av revisor til andre tenester enn revisjon utover det som kjem fram i den årlege revisjonsplanen. Revisjonsplanen vert lagt fram for styret og der kjem det fram kva som er revisjonsarbeid og kva som er anna arbeid. I ordinær generalforsamling skal styret orientere om godtgjersla til revisor, fordelt på revisjon og andre tenester.

Resultatet i Sogn Sparebank vert delt høvesvis mellom sparebanken sitt fond og eigenkapitalbeviskapitalen. Banken nyttar inngåande balanse for eigenkapitalbevis med tillegg av utjamningsfond ved utrekning av eigenkapitalbevisbrøken. Sogn Sparebank har som mål at minst 50 % av resultatet etter eigenkapitalbevisbrøken vert utbetalt som utbyte, resten vert lagt til utjamningsfondet. Kvart år vurderer styret og generalforsamlinga behov for overføring til gåvefondet.

Då EU i 2025 heva terskelverdiane for rapporteringsplikt, fall bankane i alliansen utanfor kravområdet. CSRD-prosjektet vart derfor avvikla, men mykje av arbeidet blir vidareført. Eika har valt VSME, Voluntary Sustainability Reporting Standard for SMEs – frivillig berekraftsrapportering for små og mellomstore verksemder, som felles frivillig rapporteringsstandard – i tråd med oppmodinga frå Finanstilsynet. Dette sikrar sams struktur, god kvalitet og eit nivå som er tilpassa lokalbankane i Eika. Reguleringane rettar seg i aukande grad mot risikostyring. Difor har Eika etablert eit felles prosjekt som skal hjelpe bankane med å møte nye krav i CRD6/CRR3. Dette gir bankane felles metodikk, malar og rettleiing – og sikrar at ESG-risiko blir handtert på ein strukturert og dokumenterbar måte. Sogn Sparebank har slutta seg til dei felles rapporteringsstandardane frå Eika.

Sogn Sparebank står også saman med dei andre bankane i Eika Alliansen om ei felles klimaambisjon. Denne set retning for klimaarbeidet vårt og hjelper oss å prioritere tiltak, følgje opp utviklinga og bidra til ei trygg og gradvis omstilling mot netto null i 2050. Banken har starta opp arbeidet med å bli miljøfyrtårnsertifisert, dette arbeidet held fram i 2026.

Moglegheitene i banken skal vere like, uavhengig av alder, etnisitet, nasjonalt opphav, kjønn, avstamming, hudfarge, religion, legning, livssyn eller funksjonsevne. Banken godtek ikkje nokon form for verbal, psykisk, fysisk eller seksuell trakassering. Kvinner og menn skal ha like moglegheiter for å kvalifisere seg til alle typar oppgåver, og karrieremoglegheitene skal vere dei same. Banken har nulltoleranse for diskriminering og har fokus på at kompetanse skal vere toneangivande.

Banken har signert «Kvinner i finans charter», som har som mål å auke kvinneandelen i leiande posisjonar i finansnæringa i Noreg. Banken har satt seg mål om femti prosent kvinneandel i leiar- og ansvarsstillingar i banken. For Sogn Sparebank er det kompetansen som er det avgjerande, og ikkje kva kjønn ein har. Likevel vil leiinga oppmuntre og legge til rette for at fleire kvinner rekk opp handa og tek ansvar. For å få til dette er det viktig med gode førebilete. Gjennom 2025 har endå fleire kvinner i organisasjonen teke på seg spesialist- og ansvarsrollar. Kompetanseutvikling er eit fast punkt i medarbeidarsamtalen. Det er viktig for banken med god kjønnsdeling, aldersfordeling og mangfald i organisasjonen. Vi har folk i ulike aldrar og livssituasjon, god kjønnsfordeling og variasjon i alder frå 23 til 68 år, og gjennomsnittsalderen er 45 år. Leiargruppa i banken består av 2 kvinner og 3 menn, 3 av 5 teamleiarar er kvinner.

Til saman er det utført 43,2 årsverk i 2025, fordelt på 46 tilsette. Det er tilsett 5 nye medarbeidarar i året som har gått.

Banken set sterkt fokus på å ha eit solid verdigrunnlag som seier noko om korleis vi skal ha det saman på jobb. For oss er det viktig å vere ein nær, sutalaus medspelar både mot kvarandre, kundar og mot samfunnet. Medverknad er ein føresetnad for eit godt arbeidsmiljø og kvar og ein av medspelarane har ansvar for å bidra til trivsel både for seg sjølv og andre.

Teams og digitale møtepunkt er vårt viktigaste arbeidsverktøy og ein naturleg del av arbeidskvardagen, samstundes som det er eit positivt supplement med fysiske samlingar for å bli endå betre kjende og kjenne på samhald. Banken nyttar mykje ressursar for å legge til rette for faglege og sosiale samlingar på tvers av kontor og team. Styret er opptekne av eit godt arbeidsmiljø, og leiinga i banken vil halde fram med å prioritere dette arbeidet.

Sogn Sparebank legg stor vekt på tett og trygg oppfølging av medspelarane våre. Gjennom strukturert oppfølging, nærleik til kvar enkelt og målretta kompetansebygging skapar vi ein trygg og inkluderande og sutalaus arbeidsplass. Vi vil halde fram med dette.

2025 har vore eit viktig år i høve å sette retning og strategi for banken framover. Innan kvart strategiområde har vi jobba i grupper på tvers av organisasjonen for å få fram det beste i alle ledd. Som følgje av høg involveringsgrad på tvers av nivå og funksjonar i banken, står vi att med ein konkret og målbar strategi som alle kan kjenne seg att i.

Det har vore ei positiv utvikling i sjukefråværet som i 2025 var på 4,91 % mot 8,47 % året før. Vi har også tilbod om helseforsikring til alle tilsette, og vi ser at det er til gunst både for arbeidsgjevar og arbeidstakar. Det er ikkje rapportert om skadar eller ulukker i samband med arbeidet. Banken har internkontrollsystem for helse, miljø og sikkerheit. Vernerunde blir gjennomført og fylgt opp årleg og gjennomfører arbeidsmiljøutvalsmøter saman med tillitsvalde og verneombod.

Frå 1. januar 2026 er arbeidsmiljølova tydelegare på at psykisk helse skal vernast like godt som fysisk helse. Sogn Sparebank har over tid styrkt arbeidet med både førebygging, oppfølging og systematisk HMS for å sikre eit fullt forsvarleg arbeidsmiljø. Vi prioriterer ein trygg, inkluderande og utviklande arbeidsplass der open dialog, tett medarbeidaroppfølging og felles kulturbygging gir gode rammer for både helse, trivsel og fagleg vekst.

Banken vil rapportere i tråd med lovkrava for openheitslova innan fristen 30. juni 2026. Openheitslova skal fremje verksemder si respekt for grunnleggjande menneskerettar og anstendige arbeidsforhold i samband med produksjon av varer og levering av tenester. Lova skal også sikre ålmenta tilgang til informasjon om korleis verksemder handterer negative konsekvensar for grunnleggjande menneskerettar og anstendige arbeidsforhold. Rapporten vil bli publisert på banken si heimeside under menypunktet investorinformasjon og rapportar.

Banken er ei kompetansebedrift og bidreg til kompetansearbeidsplassar i distriktet. Gjennom banken sin bedriftsavtale, utarbeida i samarbeid med dei tillitsvalde, er det gode mogelegheiter for kompetansehevande tiltak for alle tilsette. Det er ein ressurs å ha folk som ynskjer å heve eigen kompetanse, som igjen gagnar kundar og lokalsamfunn. Vi har fokus på å informere og forklare kva moglegheiter som finst for dei tilsette i banken, både i rekrutteringsprosessar og med jamne mellomrom i organisasjonen generelt. Kompetanseutvikling i Eika Skulen er også med å sikre god miljøleiing og berekraftige val i eigne organisasjonar og ovanfor leverandørar og samarbeidspartnarar.

Rekrutteringsprosessen er eit kontinuerleg arbeid i kampen om dei rette hovuda. Når banken kan vise til gode resultat og nøgde medarbeidarar, godt engasjement i sosiale media, positive medieoppslag og gode kundeopplevingar, då er sjansane større for at ein også tiltrekk seg gode folk når det er behov for det. Dette er noko vi jobbar målretta for gjennom heile året.

Rådgjevar er ofte ein sparringspartnar for kunden og vi har høve til å bidra til meir berekraftig åtferd hjå kundane gjennom å formidle kunnskap om temaet og gje gode råd i dialogen med privat- og næringskundar. Vurdering av ESG-kriteria er ein naturleg del av alle kredittsaker.

Banken kan også tilby berekraftige produkt til kundane, og framover skal vi jobbe med å utvide produktsortimentet på grøne produkt. Eika Kredittbank sine smålån vert tilbydde og marknadsført som produkt du kan nytte til oppussing og refinansiering. Eika Kapitalforvalting sine retningsliner gjer at spareprodukta som banken tilbyr via Eika, oppfyller strenge krav til samfunnsansvar, berekraft, etikk og openheit.

Banken skal bekjempe økonomisk kriminalitet på bakgrunn av risikovurderingar og oppfølging av antikvitvaskområdet, mistenkelege transaksjonar og mogelege svindelsaker.

Banken sine rutinar og retningsliner baserer seg på kvitvaskingsloven og tilknytt forskrifter. Våre hovudoppgåver rundt dette er å gjennomføre risikovurderingar, gjennomføre kundekontroll, undersøkje mistenkelege transaksjonar og kundar, samt rapportere mistenkelege transaksjonar til Økokrim. Banken har nulltoleranse for korrupsjon. Det gjeld både internt i organisasjonen, hjå banken sine kundar, i selskap banken investerer i, hjå våre fondsleverandørar og hjå leverandørar til banken sine eigne innkjøp. Opplæring er ein viktig del av arbeidet med AHV, der alle i banken, frå den enkelte rådgjevar til styremedlemar, skal ha kunnskap om AHV ut frå den rolla dei har. Dette er eit område med sterkt fokus frå leiinga og styret.

Banken har også eit ansvar for at kundane er med på den digitale utviklinga og dei digitale verktøya banken tilbyr. Eika har sett i verk svindeltiltak, banken har sett i verk internt kompetansehevande tiltak og vi informerer kundane både i sosiale media, gjennom media og gjennom møteplassar.

For å bidra til tryggare kvardagsøkonomi i lokalsamfunnet vårt har svindelteamet reist rundt i Sogn og møtt pensjonistmiljøet. Der har dei delt praktiske råd om korleis ein kan kjenne att svindelforsøk og verne seg mot uønskt aktivitet på nett og telefon.

Vi opplever at mange ønskjer oppdatert og lettfatteleg informasjon i eit stadig meir digitalt banklandskap, og desse møta har gitt oss gode samtalar og nyttige tilbakemeldingar. Det gir oss samstundes høve til å lære meir om kva som skapar tryggleik for kundane våre – uansett alder og digital erfaring.

Vi jobbar førebyggjande, men er også avgjerande når uhellet har skjedd, kunden har blitt svindla og det er ein kamp mot klokka for å forsøke å stoppe transaksjonane eller få pengane tilbake til kunden. Alle medarbeidarar i banken kan handtere innrapportering av svindelsaker, og svindelteamet sit klare for å forsøke å hjelpe kunden så godt det let seg gjere.

Gjennom føredraget Personleg økonomi har medspelarar frå Sogn Sparebank reist rundt til skular i regionen for å gi elevar ei praktisk og forståeleg innføring i korleis dei kan ta smarte val i kvardagsøkonomien. Målet er å styrkje økonomiforståing blant unge og gi dei eit tryggare grunnlag før dei tek steget inn i vaksenlivet. Tilbakemeldingane har vore udelt positive og vi er klare for ein ny runde i 2026 der vi besøker endå fleire skular enn sist.

Vi er stolte av å vere på lag med lokalsamfunna – det vil seie å samarbeide tett med dei vi har rundt oss, inkludert lag, organisasjonar, bedrifter og offentlege aktørar. Gjennom tett samarbeid skal vi bidra til å gjere Sogn til ein betre stad å bu og vekse opp i.

I retningslinjene for gåvefondet til banken er berekraft, folkehelse og barn og unge er i fokus, og vil få særleg merksemd. Gåvemidlane skal skape verdiar og hjelpe lag og organisasjonar til å gjennomføre idear og tiltak som kjem flest mogleg til gode og skapar gode møteplassar. I 2025 vart 8,8 mill. kroner gitt i gåve til allmennyttige føremål. Gåvemidlar som ikkje er nytta i 2025, er øyremerka seinare gåvetidelingar. Mottakarane av gåvemidlar har eit stort spenn frå innkjøp av notestativ til det lokale spelemannslaget, via gratis bading for ungdom i utebasseng om sommaren og etablering av pumptrack, til finansiell støtte for at alle borna på laget skal få lov til å delta på årets høgdepunkt - fotballcupen. Avslutningsvis i 2025 inviterte banken til gratis nyttårskino, med stor oppslutnad.

Diagrammet nedanfor viser kor stor del av gåvemidlane som fell inn under dei ulike ESG-kriteria (E – miljø, S – sosiale forhold, G – styring). Nokre tiltak banken støttar, bidreg til fleire av desse kriteria samstundes – til dømes kan eit prosjekt både ha ein positiv miljøeffekt og samtidig styrkje sosiale møteplassar. Når ei og same gåve blir registrert under fleire kategoriar, vil ho dermed telje med i fleire av søylene i diagrammet. Dette betyr at summen av alle kategoriane ikkje nødvendigvis vil samsvare med den totale mengda utdelte gåvemidlar.

Kort forklart: Éi gåve kan ha fleire berekraftsdimensjonar, og derfor overstig kategorisummeringa den faktiske totalen.

Sogn Sparebank trur på krafta som ligg i samarbeid. Gjennom året tok banken initiativ til fleire gründerretta tiltak som pitchkonkurransen Sognapitch som over tid har funne sin form under Næringskonferansen i Flåm. Dette er utarbeida og gjennomført i tett samarbeid med Kunnskapsparken Vestland.

I november var banken med å arrangerte Gründerkveld i samarbeid med Årdal Utvikling og Kunnskapsparken Vestland. Vi trur på samarbeid for å få til utvikling og gode møteplassar i Sogn, og det vil vi jobbe med også framover.

Gjennom året har vi også stilt opp på fleire arrangement med stand og lykkehjul og delteke i ulike næringsforum i regionen. Desse partnarskapa gir oss verdifull innsikt, aukar gjennomslagskrafta til lokale initiativ og gjer at vi saman kan skape eit sterkare, meir berekraftig og levande lokalsamfunn.

Styret vurderer at resultatrekneskapen og balansen med tilhøyrande notar gjev utfyllande og tilfredsstillande informasjon om verksemda i 2025 og banken si stilling ved årsskiftet. Etter styret si vurdering har det heller ikkje vore hendingar av vesentleg karakter for banken etter utgangen av rekneskapsåret 2025. I samsvar med rekneskapslova stadfestar styret at føresetnaden om framleis drift er til stades.

Banken har i 2025 oppnådd gode resultat, og skal halde fram med å vere ein nær og synleg medspelar for kundane og lokalsamfunna i Sogn. Dette lukkast vi med ved å stimulere til aktivitetar og verdiskaping, og vere ein god partnar for privatkundar og verksemder

Framover skal banken jobbe for ein berekraftig og ansvarleg vekst, forankra i banken sitt samfunnsoppdrag og lokale rolle. Banken vil jobbe for å auke marknadsdelen i våre kjerneområde og utforske nye marknadssegment der det er naturleg.

Banken skal tilpasse seg endringar i marknad og teknologi, og utvikle og tilby relevante, framtidsretta produkt og tenester for kundar i alle livsfasar. Endringar i bransjen og regulatoriske krav frå myndigheitene skjer i eit høgt tempo, og banken skal vere proaktive i møte med nye krav og forventningar.

God styring av risiko vil alltid vere eit prioritert område. Kompetanseutvikling er eit prioritert område i banken for å sikre at Sogn Sparebank er ein attraktiv arbeidsplass for framtida.

Styret vil retta ein stor takk til heile organisasjonen som gjennom 2025 har lagt ned ein stor arbeids-innsats for kundane, for kvarandre og for lokalbanken.

Ein takk også til alle som har bidrege gjennom banken si generalforsamling og andre utval, og ikkje minst alle banken sine kundar og samarbeidspartnarar som støttar opp om Sogn Sparebank.

Utarbeiding av rekneskap i samsvar med IFRS krev at leiinga i enkelte tilfelle gjer føresetnader og nyttar estimat og skjønnsmessige vurderingar. Estimat og skjønnsmessige vurderingar blir vurderte løpande, og er baserte på historiske erfaringar og føresetnader om framtidige hendingar som blir vurderte som sannsynlege på balansedagen. Det er knytt uvisse til dei føresetnadene og forventningane som ligg til grunn for dei nytta estimata og skjønnsmessige vurderingane. Faktiske framtidige utfall kan avvike frå estimata og føresetnadene.

Banken sine forretningsaktivitetar fører til at verksemda er eksponert for ei rekkje finansielle risikoar. Banken si målsetting er å oppnå ein balanse mellom avkastning og risiko, og å minimalisere potensielle negative verknader på banken sitt finansielle resultat.

Banken si finansielle risikostyring er etablert for å identifisere og analysere desse risikoane, samt å etablere passande risikorammer og -kontrollar, og å overvake at reglane vert haldne gjennom bruk av pålitelege og oppdaterte informasjonssystem. Banken vurderer jamleg dei etablerte retningslinjene for risikostyring, og systemet som er etablert for å sikre at endringar i produkt og marknad vert reflektert i risikorammene.

Ansvaret for banken si risikostyring og kontroll er delt mellom banken sitt styre og leiing. Styret vedtek banken sine mål og rammestruktur innanfor alle risikoområde, som retningslinjer for styring av risiko innan kredittgjeving, handel med verdipapir og for renterisiko. Det er fastsett rutinar for rapportering til styret om utviklinga på risikoområda, og det er vedteke ein eigen finansstrategi. Det er òg utvikla eit eige internkontrollsystem for den totale bankverksemda. Det er fastsett retningslinjer og prinsipp for internkontroll. Administrasjonen har ansvar for å følgje opp den daglege risikostyringa.

Styret er merksam på risikoen ved høg utlånsvekst og kva verknad det kan ha for kapitaldekninga i banken. I tillegg er styret kjend med risikoen knytt til å vere meir avhengig av pengemarknaden. Styret har difor sett seg mål både på kapitaldekninga og likviditeten i banken, og vil treffe tiltak dersom kapitaldekninga og likviditeten kjem under desse måla. Adm. banksjef har ansvaret for den samla risikostyringa i banken. Alle vedtak knytt til risiko og risikostyring vert normalt fatta av adm. banksjef i samråd med andre medlemmar i banken si leiing. Ass. banksjef har ansvar for utvikling av modellar og rammeverk for styring og kontroll i banken. Alle leiarar i banken har ansvar for å styre risiko og sikre god internkontroll innanfor eige område: i tråd med banken sin vedtekne risikoprofil.

Drifta av banken er påverka av ei rekke tilhøve. Særleg innverknad har rente- og kredittrisiko. Andre større risikoar er likviditets- og kursrisiko i verdipapir. Bankverksemda medfører òg operasjonell risiko.

Sogn Sparebank nyttar standardmetoden for kredittrisiko og basismetoden for operasjonell risiko. CRR3 vart innført i Noreg frå 1. april. Endringane i regelverket for standardmetoden inneber meir risikosensitive risikovekter enn i CRR2, særleg for lån med pant i eigedom, der belåningsgrad og verdsetjingsprinsipp får større betydning.

Per 31. desember 2025 er kravet til bevaringsbuffer 2,5 %, systemrisikobuffer 4,5 % og motsyklisk kapitalbuffer 2,5 %. Kravet til rein kjernekapital er 4,5 %, slik at samla minstekrav til rein kjernekapital er 14,0 %. I tillegg har Finanstilsynet per 31. oktober 2025 fastsett eit pilar 2-krav for Sogn Sparebank på 2,1 % (tidlegare 3,0%), som må dekkjast med minimum 56,25 % rein kjernekapital og minimum 75 % kjernekapital. Regulatorisk minstekrav til rein kjernekapital, inkludert pilar 2-kravet, er dermed 15,18 % på konsolidert nivå.

Banken sitt minstekrav for rein kjernekapitaldekning på konsolidert nivå er minimum 16,68 % per 31. desember 2025.

Ein sentral del av banken si kapitalstyring er konsernet si interne vurdering av kapitalbehov (ICAAP – Internal Capital Adequacy Assessment Process). I denne prosessen vert det gjort vurderingar av alle vesentlege risikoar banken er eksponert for, med tilhøyrande vurdering av internt kapitalbehov for dei ulike risikoane. Styret går i samband med ICAAP gjennom konsernet sine viktigaste risikoområde og den interne kontrollen. Gjennomgangen har som mål å dokumentere kvaliteten på arbeidet innan dei mest vesentlege risikoområda. Gjennomgangen skal sikre at endringar i risikobiletet vert identifiserte, slik at nødvendige forbetringstiltak kan setjast i verk. Tilleggsinformasjon om banken sin ansvarlege kapital og risikoprofil er offentleggjort på banken sine heimesider – pilar 3-dokumentet.

Kredittrisiko oppstår hovudsakleg i banken si utlånsportefølje, men òg i samband med banken si behaldning av obligasjonar, sertifikat og finansielle derivat.

Banken si maksimale eksponering går fram av tabellen under:

Inkludert i totale utlån til bedriftskundar ligg ansvarleg lån til Norway’s best Group AS med kr. 41,9 mill. Deler av desse låna kan konverterast til eigenkapital.

Betalingslette er endring i avtalte vilkår som er innvilga fordi kunden har økonomiske vanskar, og som ikkje ville blitt innvilga dersom kunden var i ein betre økonomisk situasjon.

Antal dagar i forfall blir rekna frå det tidspunktet eit lån får eit overtrekk som overstig den relative og den absolutte grensa. For både PM- og BM-kundar er den relative grensa lik 1 % av kunden sine samla eksponeringar.
• For PM-kundar er den absolutte grensa 1 000 kroner
• For BM-kundar er den absolutte grensa 2 000 kroner

Banken sine utlån til kundar, ubenytta kredittar og garantiar er grupperte i tre steg. Fordelinga mellom stega blir gjort for kvart enkelt lån eller engasjement. Tabellane nedanfor spesifiserer endringane i perioden sine nedskrivingar og brutto balanseførte utlån, garantiar og ubenytta trekkrettar for kvart steg, og inkluderer følgjande element:

• Overføring mellom stega som følgje av endringar i kredittrisiko, frå 12‑månaders forventa kredittap i steg 1 til forventa kredittap over levetida til instrumentet i steg 2 og steg 3.

• Auke i nedskrivingar eller engasjement ved utferding av nye utlån, ubenytta kredittar og garantiar.

• Reduksjon i nedskrivingar eller engasjement ved frårekning av utlån, ubenytta kredittar og garantiar.

• Auke eller reduksjon i nedskrivingar eller engasjement som følgje av endringar i inputvariablar, berekningsføresetnader, makroøkonomiske føresetnader og effekten av diskontering.

• Netto endring viser endring i tap eller engasjement som følgje av innbetalingar eller auke i saldo der lån ikkje har skifta steg.

• Konstaterte tap.